Ómirim

Dúnya-fanıy, kelmek ǵanıy,Keldimiw endi, ne kórdim?Bir push dáne bilseń anıy,Bir kúnshe joqdur ómirim.

Berdimurat meniń ózim,Bilmeske biymáni sózim,Zapırandek soldı yuzim,Ótti ármanda ómirim.

Birimde háwlep kúlgenim,Ata-anamdı bilgenim,Úshimde ǵaz-ǵaz júrgenim,Alaqanda turǵan ómirim.

Bes jasımda kewlim ósti,Jeti jasta tisim tústi,Bilmey jaqsı-jaman isti,Qus talpınıslı ómirim.

On jasımda oqıp kálam,Jası úlkenge berdim sálem,Ótip dúnyadan ata-anam,Qan jılap qalǵan ómirim.

On birimde janım jaqtım,On úshimde buzaw baqtım,Jetimlilik gúlshesin tattım,Ǵamlı balalıq ómirim.

Men endi on tórt jasımda,Íshqı sawdası basımda,Qız-jawan enip túsimde,Tawıs súwretli ómirim.

On altıda, on jetide,Zárdeler tolıp kewilge.Jaqpay oyın-zawıq bizge,Mashqala túsken kúnlerim.

Qáddi dalı nazlar menen,Kewil xoshi sazlar menen,Ilme sultan sózler menenDegiship ótken kúnlerim.

Nalısh etip bir allaǵa,Medirese istáb barmaǵa,Ilmu fan hasıl qılmaǵaTalaban bolǵan kúnlerim.

Jigirmada darday bolıp,Júk kótergen narday bolıp,Gúrkiregen sherdey bolıp,Kúshke tolısqan kúnlerim.

Jigit jigirma birinde,Taqat tappas bir orında,Bir batpan samal murında,Sáńkiyip salǵan kúnlerim.

Kewil ánjamsız, qayǵı-dárt,Íshqi háser ishińde órt,Tórelik joq jigirma tórt,Shoǵı háwirli kúnlerim.

Túyilse tis penen sheshken,Topılsa qılıshsız kesken,Jigitlik jigirma bestenTolıqsıp ótken kúnlerim.

Bir ǵarǵısań jigirma altı,Endi aytar sózdiń saltı:Ilmu sáwbet esimdi aldı,Manıy izlegen kúnlerim.

Belgili xalıqqa nıshanı,Yadimdadur hár qashanı,Qartayǵanda Kúnxojanı,Kórgen kúnlerim, kúnlerim.

Aytıń sózlerim tıńlatıp,Kemis jerini ońlatıp,Bir yarım ay birge jatıp,Ház etip ótken kúnlerim.

Otızında otaǵası,Tapsań bergil qonaq ası,Bolarsań jigit aǵası,Aqıl toqtatqan kúnlerim.

Biymáni gáp sózlenbegen,Sóz kelgende eglenbegen,Shalqıp aǵa begler menen,Hám sáwbet bolǵan kúnlerim.

Payanı joq panıy dúnyaAldadı jol salıp qıyaKóp ómirim ketti zaya,Ahıw-afǵanlı ómirim.

Kimler ótken ómirin bilmes,Qartaysa hám qırqqa kelmes,Qırqqa kelse, nırqqa kelmes,Qırq mashaqatlı ómirim.

Baydıń malı, joqtıń halı,Bul dúnyanıń ǵalmaǵalı,Shep esip dáwran samalı,Qazan urǵanday ómirim.

Qırq hám qalıp, keldi eliw,Qıyın emes parqın biliw,Jarasar ma oynap-kúliw,Elide belli ómirim.

Alpıs hám alqımlap keler,Shapanıń jalpıldaǵan keler,Kelinler tońqıldap keler,Álip qaddi dal ómirim.

Dúnya-dúnya bolǵanıń ba?Endi bizden qalǵanıń ba?Qazan urıp solǵanın ba?Suw kibi tınǵan ómirim.

Kórdim Xorezm, Buxardı,Dańqı shıqqan kóp sháhárdi,Kemlik penen shash aǵardı,Ótti ármanda ómirim.

Bul dúnyanıń bası qızıq,Tili – shiyrin, kózi – súzik,Aqıbeti anıń buzıq,Kóp pushaymanlı ómirim.

Kim jetpisten házlik tapqan?Halıń múshkil qulbaraqtan,Dizeń asarlar qulaqtan,Músápirxana ómirim.

Otırsań bolarsań opaq,Tursań bolarsań sop-sopaq,Kúnler qayda apaq-shapaq?Áўere bolǵan ómirim.

Adam menen bolmay isiń,Dahan kewip, túser tisiń,Dizińnen sarqılıp kúshiń,Óter dáwranlı ómiriń.

Shayır hám bilgenin jazar,Haq kimlerge salsa názer,Sonıń isi bolar bazar,Bazarın sawǵan ómirim.

Dártlerim kóp kókey keser,Ótken dáwran eske túser,Jigirma bes – jilli háserEndi joq saǵan, ómirim.

Kárўan kósher, dúnya óter,Bende neshik iláj eter?Qılısh súyrep ájel jeter,Keldiń – kelmediń, ómirim.

Baq ya ájel jetse dedim,Zalım shıraǵı óshse dedim,Sonsha nalıp qayǵı jedim,Ótip ármanda ómirim.

Haqqa nalıs etkil endi,Árman menen ketkil endi,Aytar sózin pitkil endi,Ótti dúnyadan ómirim.

Kelme-ketpeli sóz ayttım,Ya bilmeymen teris qayttım,Pirge daqıl basım shattım,Ótti qapeste ómirim.

Berdimurat haqtıń qulı,Sahrada ósken búlbili,Jazıldı bul jılqı jılı,Xosh bol, ármanlı ómirim.