Qasıń qara, beliń názik,Oń qolıńda tilla júzik,Ǵayratıńdı búgin kórdik,Qupiyada ildiń kelin.
Shashıń qara, júziń appaq,Qundız kirpik, jupqa dodaq,Piste murın, lábiń qaymaq,Kelbet jaǵıń kelgen kelin.
Qulaǵıńda altın sırǵa,Tiliń shiyrin, kewliń mırǵa,Keldim saǵan zordan-zorǵa,Qarsı aldıńda turman, kelin.
Kópke úlgi etken isiń,Jaltıraydı hinji tisiń,Jurttan artıq aqıl-esiń,Qapa bolıp tursań kelin.
Jarqıraydı júziń ayday,Tuwǵan anań seniń qanday,Sóziń shiyrin, tiliń palday,Periyzattan artıq kelin.
— Berdaq - Tańlamalı shıǵarmalarınıń jıynaǵı
Artıq seniń aqıl-oyıń,Tal shıbıqtay talma boyıń,"Qarma-jarma" bolıp toyıń,Árman menen tursań kelin.
Qaynaǵaǵa basıńdı iyip,Qayǵı menen qabaq úyip,Árman menen ishiń kúyip,Ar-sar bolıp tursań kelin.
Óńirińe taǵıp teńge,Kewlińde bar onnan óńge,Hám qaynige bolıp jeńge,Jat ellerde tursań kelin.
Kúni-túni azap shegip,Kózlerińnen jastı tógip,Qabırǵańdı qayǵı sógip,Árman menen júrseń kelin.
Artıq bahań eliw tuwar,Sennen alıp ákeń sawar,Burınǵınıń jolın quwar,Baxtıń solay boldı kelin.
Ashılmay ıǵbalıń ábes,Kórkińe bolmadı sáykes,Qaptalında eki biykesh,Siyne-sánli tursań, kelin.
Xorlıq azap kórgen kúniń,Jılaw menen ótti túniń,Erkin shaǵlap shıqpay úniń,Qapalıqta tursań kelin.
Esitildi zarıń maǵan,Ne aytayın endi saǵan?Qayǵıdan men de oǵan,Kúniń solay ótti, kelin.
Kóp sarsılıp, bolma qapa,Qıya shólde shekpe japa,Kelse saǵan sińli-apa,Ne aytarsań turıp, kelin?
Qarasam qısım belleriń,Shiyrinnen tatlı tilleriń,Jawdırap jadıw kózleriń,Tutqınlanıp tursań, kelin.
Usı bastan etip talap,Kisi ushin júrme jılap,Erterekten teńińdi tap,Matawlıqta turma, kelin.